《種子》（62）
寒菲早就想到當中的危機，和我及萬珂一起待在走廊閒聊，打算到最後一刻才入課室去。
「好耐無見！」莊鄒在響鐘前七分鐘才現身。
細聽我們述說這幾天的事情細節後，她表示明白我們的顧慮，但認為我們可能在某些細節上看漏眼，事情未必是如我們所想的那方向發展。「我想同龍知銳見一見面，先至下定論。」莊鄒的這句話沒甚麼不妥，但聽在寒菲耳內，就像一根針那樣刺耳。明顯看得見寒菲臉上的玄青。
猶幸理智成功說服寒菲，讓她放鬆下來：「係。要冷靜。」惟還不夠兩秒，寒菲突然大哭起來，倒在莊鄒懷內痛哭：「點解…點解…」
「乖…乖…」莊鄒眼泛淚光，擁抱著異常激動的寒菲：「仲有得救…千祈唔好放棄！唔放棄就有希望！」動人的場面，惹得旁邊的萬珂連連拭淚。
只有我，一頭霧水。
鐘聲響起，寒菲好不容易才止住淚水，強顏歡笑，回到理科六班課室去。
「佢做咩喊？」我問，趁老師還未到課室來。
「擔心龍知梓佢…會放棄栽種種子…」萬珂也眼紅紅。
「半年前玩『睇醫生』嗰日，龍知梓俾我用金光照過之後，即刻變到好好人，同六樓男廁嗰陣，簡直係兩個人。因為金光可以暫時驅走後天累積嘅惡念惡習，令佢本身善良嘅性格再次彰顯出嚟，等佢可以重新去探究同發展最原始嘅性格，紮實根基。
一直好地地。點知龍知銳一返嚟，龍知梓嘅情況就極速惡化。成日飲酒、情緒失控、壓抑自己真實情緒…寒菲係同龍知梓最親近嘅一個，清楚睇住龍知梓由壞變好、再由好變壞，所以感受特別深。」
「明白…」我也嘆了一口氣。「仲以為你哋輪迴咗咁多次，會一早對塵世嘅情情愛愛免疫咗！」
「你講得啱！遲早會有呢日！不過唔知仲有幾耐先到。因為要去到『看破紅塵』嘅境界，先可以好理性咁思考同解釋世上一切一切，知道佢哋都係過眼雲煙。除咗最原本嘅『我』，對情愛、物質、後天培育出嚟嘅『我』…諸如此類，一切多餘嘅執著，都可以喺『看破紅塵』嘅境界自然放低。」莊鄒的話依然玄妙，但對今時今日的我而言，又不會太難懂。
「好多修行者，為咗早日看破紅塵，所以喺各個層面上都壓抑無視真實情感同慾望，想將自己同俗世畫一條分明嘅界綫。例如麥澤，佢無視自己同前人（外賣哥）嘅宿世緣份，特意避忌，結果難以接近問題核心，未能真正解決問題。寒菲，一直唔肯承認自己對龍知梓嘅感情，最後自亂陣腳，好可能會被表面假象誤導，落錯判斷。
我同萬珂一早見到呢個問題，決定由另一方向去試，試下跟住自己嘅真實情感去做。結果，萬珂對你嘅情感過於氾濫，逐漸被你同化。而我同大輝之間呢…」講到她自己和大輝的事，莊鄒又突然停住了，吊人心癮。「唔可以話你哋知！因為關乎大輝嘅未來！」這討厭的傢伙！可恨，天公竟也幫著她！老師剛巧到課室來，止住了所有人的悄悄話。
連續數個課堂，我慘被八卦蟲咬得整個人心緒不寧！小息時，她又伏桌裝睡不回應！爛招數！莊鄒這傢伙！！！
午飯時間，打算找寒菲一起午餐去。但她被班內數個Die-hard Evil纏上，逼於無奈答應和他們「談心」去。見他們色迷迷的樣子，我鐵定他們的下場定是慘不忍睹。
「好彩佢哋係睇中寒菲。如果搞我同萬珂，一定走唔甩！」莊鄒幸災樂禍。
「你吸幾十隻蟲仔過嚟，嚇走佢哋咪得囉！再唔係，萬珂用金光照一照，等佢哋喊到腳軟，跪地嗌媽媽！」我打趣道。
驀地，莊鄒止住了腳步，驚訝地轉頭問萬珂：「乜你無講俾登仔知咩？」
萬珂怯怯地搖搖頭。
「萬珂俾黑蛇纏住，發唔到金光。我就虛耗過度，有排都未可以恢復能力。」莊鄒邪笑，搭著我肩膊：「靠晒你喇！」
「唔會咁好彩啩！」我的確很怕，望以僥倖心態去自欺欺人。
一步一禱告，祈請滿天神佛保祐小弟和大家，出入平安…
正要踏出校門，一隻肥大的手掌從後搭著莊鄒肩膊。我仨回頭一望。是肥明和數張不懷好意的笑臉：手繩男、猩猩男、波鞋男、名錶男。
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言