《種子》(49)
第八十六頁後,全是莊鄒給大輝的話。
「得閒要去幫莊爸莊媽搬藥材。佢哋有關節痛,唔可以搬重嘢上落樓梯。」
「好心你做下運動啦!隔住件校服,都見到你個肚腩凸出嚟喇!」
「你對拳套,我放咗喺床下底個紅色箱入面。你可以隨時攞返走。」
「傻波已經好返。我擺咗佢啲資料喺衣櫃。你跟住資料內容,就可以搵到佢。」
「…」
婆婆媽媽的,嘮嘮叨叨的,足以令大輝落淚的。
感受過兩段電影橋段一樣的愛情,我合上筆記簿,深深吁了一口氣,調整心情…
「真係你?!」前來應門的麥澤甚是驚訝。
「嚟幫莊爸莊媽搬藥材。」我亮出筆記本:「幫大輝分擔下重擔。」
「算你啦!」她狀甚安慰:「寒菲喺廚房。」
廚房內,寒菲獨個兒預備五人份的晚餐。
她簡直是古裝劇裡的巧媳婦!走位靈活,適時會到爐頭前掀鍋蓋看看餸菜的情況,然後去到星盆旁的砧板那邊,處理後期用的調味食材,還會扚一小碗湯水給麥澤試味…「唔使驚,有你份。」
「你哋估到我會嚟?」我問。
「寒菲知道筆記喺你手上,就話你一定會嚟。仲特登買料煲湯。」我今天才明白,為何麥澤經常和寒菲一起行動,因為她就是寒菲的半張嘴巴:「個湯好夠味,正!」
「聽日,去醫院,探佢哋。」寒菲遞給我一小碗湯水,甜笑。
「你點解覺得我會嚟?」我不明白當中的邏輯。
「你,有進步,關心人。」寒菲接過麥澤的碗,呷了一口湯,熱得吐吐舌。
「點解你同龍知梓要寫筆記簿?唔用群組傾?會方便好多!」我有很多問題想要問。
「係龍知梓提出嘅!佢話想將自己識得嘅嘢,寫低同你哋三個分享,話對你哋日後有幫助。」麥澤代答,讓寒菲能夠專心炒菜。
「雖然呢一刻睇唔出有咩幫助…不過跟據經驗,喺最估唔到嘅時候,冷知識就最有用!」好一個貼心的龍知梓!貼心得…我作為男生也覺窩心!
「佢同細佬…好番未?」我的提問,出於八卦,也出於關心。
「好彊。難搞。」寒菲不禁皺眉頭,直接指出重點:「盲目。」
「如果萬珂喺度,一定捉住龍知梓不停訓話。」麥澤的插話,出乎我意料。她察覺我愣住,遂加以解釋。
「孟子提出嘅五倫,父子、夫婦、君臣、長幼、朋友,基本上已經包括所有人際關係。現代人成日將『五倫』誤解,講到等同『愚忠』、『愚孝』;其實當中係有條件:對方係有盡自己責任。
仔女孝順父母,係因為父母對仔女好;夫妻相敬相愛,係因為對方對自己貞忠、愛護;臣子對君主忠心,係因為君主係仁君,值得追隨;後輩尊重長輩,係因為長輩付出咗努力,建立美好生活環境;朋友要互信,都要對方本身係個值得信賴嘅人先。
呢種付出關係,必須係相向嘅。如果單向嘅、盲目嘅,就會出現問題。」
「明白…」可能是心虛,我點頭同意作罷,不加插意見。麥澤的話,除了適用於龍知梓,還適用於大輝、外賣哥和我。
「同埋,最後想問…」我把話題拉開:「你同龍知梓係咪拍緊拖?」問的同時,我退後幾步,怕寒菲會發怒打我。
「我…」看見我怯怯的樣子,寒菲僅報以苦笑:「考慮緊。」
*****(待續)
如喜歡本作,煩請大家訂閱和分享!
亦請到FB專頁讚好及追蹤!謝謝!
如喜歡本作,煩請大家訂閱和分享!
亦請到FB專頁讚好及追蹤!謝謝!
留言
發佈留言