《種子》長篇小說（36）

《種子》（36）

午飯時間，三姝特意撇下大輝、龍知梓和外賣哥，只和我一起午飯去，為我解夢。

「萬珂應該講過以下字眼。『唔知你有乜煩惱』，向你潛意識暗示你可以對號入座，將你嘅最大煩惱展示喺夢入面；『等你睇清楚自己嘅真正想法同感受』，暗示你必須對自己誠實。

成個夢嘅背景都係你屋企，代表『家庭』係你最大煩惱嘅源頭。『家庭』對你影響有幾深？應該好深好深，因為你根本無換過場境！對你嚟講，『家庭』就係你嘅一切。

最後，亦都係最重要嘅：夢嘅內容，都只係基於你嘅個人感受。現實係點，未必同你嘅感受一樣。」

身在睡房時，不察覺身在夢中。

「個人睡房代表你最私密嘅空間、Comfort Zone。平日獨處，你會感到好自在，無壓力。若非必要，你唔會主動離開Comfort Zone。

所以你一直都傾向孤立自己，甚至好享受獨自一人。但係外界環境話你知，長此落去，唔係好事。所以你變得好矛盾，享受獨處同時，亦都渴望有人同你一齊。」

客飯廳和浴室變了樣。

「客飯廳代表你同外界接觸嘅地方。廳嘅裝修設計同傢俬款式，好明顯係抄龍知梓屋企，連帶浴室都變埋桑拿房。相信你好喜歡喺龍知梓屋企度過嘅時光，即係同我哋所有人一齊傾心事、玩無聊遊戲、討論人生…

呢種快樂感覺，係你對外界同家庭嘅幻想。可惜，現實世界唔符合你嘅幻想，所以你喺夢入面修改佢。」

廚房依舊不變，仍然整齊乾淨。

「問自己，你鍾唔鍾意煮嘢食？如果唔鍾意，廚房對你就只係一個唔帶個人感覺、只有實質功能嘅地方，代表你付出嘅努力。『廚房無變，整齊乾淨』，有三個可能性。

一，你對人生嘅所有，都無付出過真正嘅努力；二，付出過真正努力，但無太大功效；三，你有付出過努力，不過唔想再繼續，希望維持原狀，算數。邊個可能性最大，定係有其他意思，你要問自己。」

父母睡房，甚麼都沒有，僅是漆黑一片的空間。迅速關門，身後隨即響起一片人聲，回頭看見大家，正在耍樂…（註：對於麥澤和外賣哥的描述，我作出大幅修改，以保護好兄弟！！！）

「你覺得父母好陌生，對佢哋一啲認識都無，完全睇唔清。而你本身亦都無打算去了解佢哋，所以你好快就決定閂門、走人。你想逃避面對父母、家庭，因為你唔知點做，睇唔到方向，無頭緒。

你一閂門，我哋幾個就喺你背後出現。好明顯，我哋成為咗你父母嘅替代品。你想我哋成為你屋企人。

而我哋嘅行為，反映出你對我哋嘅印象…但係我哋同你之間無任何交流，而你亦都無諗過主動同我哋溝通，只係企埋一邊觀察。代表你對我哋仍然有隔膜，你想繼續觀察，直至放心。」

心儀對象（我沒有說是萬珂）給我一杯水解渴。水中倒影，是大輝的臉，我才發現自己的臉已變成「大輝」。但大輝同時在不遠處耍樂，不覺有任何異樣。我問心儀對象「我是誰」，她答「你是你」。我沒再深究。然後她搶走水杯，隨手拋到後頭。

「唔使你講出口，女神已經知道你需要，因為佢係你嘅化身。現實中，女神一定係你十分信任嘅人，你對佢無任何猜疑。

夢見自己變成大輝，係因為你希望成為好似大輝一樣嘅人！原因你問自己，因為個夢無講。」

和心儀對象有親密行為。

「仲使問？你咸濕囉！」然後是莊鄒的一連串譏笑聲。

「好彩你只係想嘴嘴。如果唔係，萬珂連渣都無得淨！」麥澤沒有笑。

「你哋點知係萬珂？」慌亂起來，我不打自招。「同埋點解連渣都無得淨？」

「見你平時望住萬珂嘅眼神，一早知你鍾意佢啦！」

「如果你情緒激動，有可能會反映喺你身體上。換句話講，如果你有諗曳曳，係好有可能無意間對萬珂落手…」

*****（待續）

如喜歡本作，煩請大家訂閱和分享！
亦請到FB專頁讚好及追蹤！謝謝！