《種子》（114）
龍知梓坐到梳化上，交出外賣哥趁亂偷偷塞到他手心的小血包，冀能向龍老先生多換一個願望：「我想拖住寒菲隻手。」
龍老先生接下小血包，寒菲隨即坐到龍知梓左邊，挽著他的臂膀，整個人倚著他。含情脈脈，抬頭一笑：「咁樣得唔得？」龍知梓仔細端詳至愛的臉旦，點頭微笑。神仙眷侶，惹人豔羨。求死的眼神，配上溫馨的畫面，百般滋味在心頭。這是龍知梓一直響往的幸福嗎？
隔著茶几，和梳化上二人面對面的，是慘被反綁在餐椅上的龍知銳、大輝、外賣哥和我。被塞口，連勸說的機會亦沒有。或許，即使行動自如，誰也挽回不了龍知梓的死意。
「識到大家，係我嘅幸運。同你哋一齊，我好快樂。不過，唔好意思。世界太亂，要花好多精神去調整心態。我無呢個天份，應該被淘汰…希望我哋有足夠嘅緣份，可以喺未來再做朋友！」這算是哪碼子的話？遺言嗎？
眼巴巴看著這一切發生，無力感令我們連激動的力氣也失去…
挽著手的二人，甚有默契地同時往後卧，快樂的仰頭，露出眉心。龍老先生先在龍知梓眉心畫下首個巫印。待血水隱去後，他坐到龍知梓身邊，在手心畫下第二個巫印，拍在眉心上，唸咒。二人合眼，眼皮微顫，眼球高速運動；梳化上的寒菲和席地而坐的麥澤，突然全身軟癱下來，東歪西倒，仿如斷線木偶；牆上的「距離裂縫」消失…
龍老先生和龍知梓同時開口說話，一樣的語調、語速、口吻。
「爺爺。我好攰。」
「以後，爺爺代你去生存。你就可以永遠休息。」
「你唔攰咩？點解唔使休息？」
「攰。但係我唔想休息。」
「點解？」
「朝早六點起身，去花園晨運、做早操。七點返入屋食早餐，飲濃普洱，食叉燒包。八點坐車返公司。九點開始工作。夜晚七點喺公司食晚餐，小休。九點放工，返屋企，沖涼。十一點前瞓覺…」
「就係咁？」
「係。」
「唔明。」
「想生存，係一種本能，唔需要原因。就算生活好無聊，但係自然而然會想繼續。」
「即係…就算生存係無意義，都會想繼續生存？」
「可以咁講。如果你一定要搵到意義或者原因，先至覺得應該生存，就會好危險，下場好似你而家咁。」
「因為我搵緊啲根本唔存在嘅嘢，所以一定搵唔到？」
「係。」
「有人同我講，世界上有『種子』。只要搵到種子，然後施肥淋水，種到開花結果，就會發現『生存意義』。曾經，我搵到種子，好努力去栽種，希望有好收成。之後發現，原來栽種嘅過程好困難、好辛苦，同埋唔知幾時可以收成，或者有無機會收成…
有一日，我仔細去睇粒種子，先發現原來佢一開始已經有好多傷痕、破口。就算粒種子未死，但最後能夠開花結果嘅機會實在微乎其微。所以，我決定放棄…我係咪好無用？」
「呢種事情，無一套客觀標準去衡量，所以我畀唔到答案你。就算，我答你『好有用』，你係咪真係會由心而發、即刻覺得自己『好有用』？個答案根本唔係其他人畀出嚟，而係你自己畀自己。」
「多謝爺爺！喺重要關頭，仲冒險講充滿希望嘅說話畀我聽。」
「唔使多謝。因為根本唔會有冒險成份。」
「哈！又係喎！會否定自己嘅人，係唔會有自救嘅意欲。所以，爺爺你唔需要內疚。」
「點解你會覺得我內疚？」
「當刻嘅感情，係最真實！」（出於阿言對龍知梓的最後說教）
「多謝知梓…你令我知道自己有幾想生存…」
「多謝爺爺…你令我唔再執著生存…」
「無我，無欲，無為，生存本質。」
「生生死死，何必執著。」
「…」
爺孫找到各自的答案後，全場陷於一片死寂當中。
不！不是死寂，還有聲音的。
我聽到自己的心跳聲、呼吸聲；大輝和外賣哥再度掙扎時，亦發出微響；寒菲的眼皮開始跳動，夢囈一樣，喃喃唸著龍知梓的名字。窗外，有汽車駛過時的引擎聲、酒醉途人的喧鬧叫囂、擾人的電視聲浪…
清醒過來，互相鬆綁。除了麥澤、龍知梓和龍老先生，眾人僅受輕傷而已，算是安然無恙。
七色麥澤仍受「賭約」約束，仍然昏迷，一動也不動。龍老先生已停止呼吸，心臟停頓，沒救了。龍知梓的脊椎上，插著一柄瑞士軍刀。是剛才外賣哥趁亂時，偷偷給予龍知梓自保用的…
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言