《種子》（109）
病房內，六個人：大輝、莊鄒、萬珂、龍知梓、龍知銳和我。
「你唔係一直都好支持我打MMA咩？點解連你都勸我放手？」大輝勉強止住眼淚、穩住情緒，因為對手是難纏的莊鄒。
「你應該比我更清楚，自己適唔適合出賽。」坐在床邊膠椅的莊鄒，氣虛力弱，身體狀況比大輝更差。但眼神卻是在座眾人中最銳利的。
「PE張同我一齊分析過對手資料同以前啲比賽片段。結論一致，就算我受咗傷，嬴面仍然有五五波。」大輝先拿PE張的說話作後盾，再講出自己的策略：「對手係力量型，技巧同速度唔夠我勁。只要我箝制住佢嘅行動，逼佢拍地認輸就得。」
「如果真係咁簡單，點解PE張強烈建議你放棄比賽？佢想嬴嘅心，絕對唔會少得過你。」莊鄒不費吹灰之力就找到盲點。「因為佢好清楚你性格，同埋呢場比賽嘅特別之處…」
言下之意，呼之欲出：大輝心理質素差。數年前，「學屆拳壇傳奇」的大輝還未真正經歷過大波折，是個平凡少年，掙扎於夢想與前途之間。傻波出事，大輝的人生自此脫了軌。朋輩、親人、社會均投以不信任一票。夢想、前途、人生去向都變得模糊不清，他連煩惱的資格也失去。
試過失去，因而害怕失去。這場比賽是難得的最後機會，而它正從指間溜走…
大輝緊抿雙唇，低頭迴避莊鄒的目光。她說得對，情況不如他說的樂觀。而不樂觀的原因，諷刺地，是他本人的心理質素。他不是敗給身上的傷口，而是自己！
「信我！我一定可以喺比賽前，調整好心態。」大輝發現問題癥結所在，解決問題定能事半功倍。
「我唔信。」莊鄒不留情面。
「如果我堅持要打呢？」大輝的語氣也硬倔起來。
「分開一下。」莊鄒語出驚人：「我唔會眼白白睇住你冒險而唔出手。」
沒想過莊鄒會以此威嚇，大輝倒抽一口涼氣，霎時間對不上話來，呆住了。
「神又係你，鬼又係你！當初係你鼓勵大輝再打MMA，而家最出力叫佢放棄嘅人又係你！」我忍不住破口大罵：「打MMA係佢嘅第二生命，你係佢最鍾意嘅人。手掌手背都係肉。無論無咗邊一面，都係痛！雖然你係為佢好，但你呢個時候講啲咁嘅嘢…」
莊鄒無視破口大罵的我，繼續盯著大輝，等待他答覆。但大輝久久說不出話來。
「既然無異議，就咁決定。」莊鄒勉力撐起身子，湊近呆滯的大輝：「好好思考下登仔啱啱講嘅說話。」臨別前，她留給大輝深深一吻，苦澀又淒楚。
莊鄒離開後，大家的焦點全落在大輝身上。
「好攰！瞓覺先！」大輝大被蓋頭，整個人瑟縮被窩之中，避過眾人目光。原以為大輝在耍爛招，逃避問題。但一陣鼾聲傳出，證明他真的睡著了。大伙只好無奈的散去。我和萬珂也服藥，小睡休息去。
醒來的時候，剛好晚餐時間。大輝胃口不錯，狼吞虎嚥，很快掃光所有食物。趁萬珂離開病房上廁所時，已恢復精神爽利的他突然振臂高呼：「我決定咗！要去比賽！」
我很高興他沒屈服於莊鄒的脅逼下，但看著受傷的他決定出賽，難免擔憂起來。我挺後悔罵莊鄒罵得那樣過份。「你真係同莊鄒分手？」
「分咗，咪之後由頭再追囉！」大輝逕自伸手拿走我的大橙繼續吃。「我直覺覺得莊鄒唔會真係想同我分手，而係逼我去改變心態。佢臨走咪錫咗我一啖。嗰一啖，有古怪！鍚完之後，成個人即刻好舒服，舒服到要即刻瞓。好似同莊鄒曳曳嗰晚咁，將一道鬱住喺我身體入面好耐嘅『氣』叫醒，由內而外打通，成個人清醒咗。」我猜，那道氣該是莊鄒用房中術放入大輝身體內的。
我同意大輝的觀察。激將法是莊鄒常用技倆，但我不明白她的用意。明明大輝本來已堅持出賽，不就正中她的意思嗎？那還要改變甚麼？
「佢叫我思考你講嘅嘢！要我諗清楚，自己係為乜而打MMA，係為自己定係為其他嘢（包括莊鄒和前途）。答案好明顯，梗係為自己。如果無莊鄒支持，無學校offer，我係咪就真係會放棄MMA？唔會！因為我想打MMA。頭先我未真正搞清目標，其他嘢就會變成我嘅心理負擔。搞清楚，即刻無晒壓力，爽！」
望著大輝神采飛揚的樣子，我猛然想起一個問題：莊鄒使用了異能，身體豈不更虛弱？連日疲勞過度，她剛才已虛弱得要由龍知銳攙扶入房；現在的身體狀況，不敢想像…我沒有告訴大輝我的聯想，以免他分神。
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言