《種子》（107）
發現我和外賣哥失蹤後，莊鄒和寒菲用盡一切方法去查探我倆的下落。莊鄒拜託大量蟲鼠，長期監視外賣妹和外賣爸；寒菲連日每天化身「基本粒子」兩次，走遍全城。此舉大為消耗二人的力量，莊鄒的身體和寒菲的精神瀕臨崩潰。可惜，徒勞無功。
莊鄒大病，卧床不起。莊爸憤怒極了，嚴禁所有人接觸莊鄒。萬珂想用金光幫寒菲穩住情緒，可惜遲了一步：寒菲無故失蹤。同日，麥澤亦突然消失了。龍知梓和龍知銳親自翻查當日的所有閉路電視片段，各走廊、出入口、停車場等，均沒異樣。極度懷疑是寒菲帶走了麥澤…
兩三日後，龍知銳告訴萬珂，龍知梓情緒極不穩定，時而大吵大鬧，時而對牆流淚，時而傻笑不止。萬珂登門造訪，龍知梓卻堅拒救助，把自己鎖在房內，足不出戶：「我自己搞得掂！！！」除了龍知銳，其他人都沒能接觸他。
這幾天，大輝親自接送萬珂上學放學，怕她亦會出事…「知你一定好想見萬珂，但係我建議你哋唔好接近佢，費事將啲麻煩人引去佢身邊…我會繼續接送，好好保護阿嫂！放心！」
「你唔使練習咩？三日後就比賽！」我和外賣哥擠在大輝狹窄的睡房內，與啞鈴為伴。
「唔使擔心！呢幾日我都打唔少交，訓練絕對充足！」大輝展示臂上的傷口給我們看。是利器造成的傷口。
「咁更加唔得！傷口復完唔切，好易爆。」外賣哥言之有理：「同埋，打法完全唔同，點可以相提並論！」
「我唔去得，你又更加唔去得（外賣哥正被警方通緝，若非必要，不宜四處走動）。咁得番登仔…」大輝清楚我的底子：勉強能保護自己，肯定不能同時保護萬珂。
「容易啦！我帶佢搭的士咪得囉！」我哈哈大笑，將自己的無能輕輕帶過。「頭先啲人問你攞咩機？發生咩事？」我另開話題，成功轉移視線。
「部機唔喺我度，我畀咗萬珂保管。應該會安全啲…」他掏出電話，展示相片給我們看。是龍知銳給我的接收器。
「有一晚，我練完拳，行返屋企。喺拳藝館附近，同一個黑衣人碰撞。我以為佢唔小心，無理到。返屋企之後，發現背囊側袋多咗部電話。開嚟睇，發覺係一部偷聽器，偷聽緊我哋幾個。無幾耐，莊鄒上咗嚟，一齊溫習。我仲發現其中一個偷聽器，係喺龍知梓送畀莊鄒個頭飾。我無話畀莊鄒知，驚佢擔心。然後諗計氹莊鄒除個頭飾畀我保管…
諗住第二日放學，私下去搵龍知梓問一問。點知你哋被警察拉咗返差館。到晏晝，連龍知梓屋企都出埋事。牽涉到警察，我有啲淆底，唔敢即刻搵你哋。你哋知我啦，個底唔靚…驚咗一晚，扚起心肝，諗住返學校同大家講。點知寒菲一返嚟就講，外賣哥真係失咗蹤，嚇到莊鄒差啲暈低。見到咁，我點敢出聲！放學之後，又話登仔都失埋蹤…亂到阿媽都唔認得！
不過萬珂一早發現我有嘢想講，私底下嚟搵我。知道來龍去脈後，佢認為部機可能同近來嘅事情有關，建議研究部機。跟住，我畀咗部機萬珂…」
時間回溯，大輝和黑衣人碰撞，該是我夜探豹房那晚。黑衣人和襲擊我的人，很可能是同一人，或是同夥。「記唔記得黑衣人有咩特徵？」
「係女！C cup！矮過我。唔肥唔瘦。長頭髮…」大輝所提及的特徵，過於籠統，沒大作用。我和外賣哥嘆一口氣，乾脆放棄這條線索。
為免大輝比賽分心，我和外賣哥隱瞞了龍知靈下達給我們的任務。或更準確地說，我們打算隱瞞所有人：實在不想將大家扯入這趟混水中。
龍知靈提及過，四姝雖是能力超卓的修行者，但因著巫覡和修行者之間的力量制衡，她們插手事情只會百害無一利。
「正常嚟講，修行者力量唔會咁唔穩定，成日暈低、情緒波幅大、復原時間過長、行為失控…但係當身邊有大量純種巫覡，出現呢種情況就合情合理。修行者主要分兩類：精神力量和物質力量。但對比極為倚重物質力量嘅純種巫覡，所有修行者都是偏向精神力量的存在。兩者嘅分別，好似磁石嘅兩極咁極端。
想像下，凡人（我和外賣哥）係普通N極磁石，未受過訓練嘅純種巫覡（龍知梓、龍知銳）係勁啲嘅N極磁石，能夠純熟運用巫術嘅純種巫覡（龍老先生）係好勁嘅N極磁石；初階修行者（四姝）係勁啲嘅S極磁石。
四粒勁啲嘅S極磁石，面對普通N極磁石當然綽綽有餘；但當加埋兩粒同樣勁啲嘅N極磁石、一粒好勁嘅N極磁石，佢哋嘅力量自然就會被嚴重干擾。
回想下，你哋相識初期，四姝完全無問題，好正常，係咪？」
我和外賣哥點頭同意。
「大家經常去知梓屋企玩、過夜，之後知銳返咗嚟，龍老先生多咗去知梓屋企，知梓屋企又係龍家搞家庭聚會嘅地方…所有事情加加埋埋，對四姝產生咗巨大嘅影響，尤其係寒菲，同知梓、知銳來往得最密。
我諗，直到而家，佢哋都未知問題出喺邊。全個龍家，只有我同龍老先生知道巫覡嘅事，仔女完全唔知。一直無打算俾佢哋知，希望佢哋同凡人開枝散葉，唔使好似我哋咁日日擔驚受怕。後來先發現家嫂都係純種巫覡，但係唔知自己真正身份…所以，四姝唔知龍家有純種巫覡都唔出奇。」
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言