《種子》(6)
餐後,八時。飽足的我軟癱在梳化上,望著四姝,享受著難得的滿足感。麥澤替我維修電話;寒菲洗碗;萬珂執整雜物;莊鄒吸塵拖地。有四個人正在為我而努力…但我不明白,何解。
「如果,你哋四個食晏時講嘅嘢係真…每日有咁多人抱怨,點解淨係幫我?」我覺得這些機會不應該屬於我,一個只懂抱怨的人。
豈料,問題換來麥澤的冷笑話一則:「因為你得意囉!」
「好爛呀!」寒菲忍不住回頭白她一眼。
「喂!我認真㗎!」我是個沉不住氣的人。
「好!我認真答你。」莊鄒放下地拖,坐到我身邊,把臉湊近,望入我眼:「因為你…」她故意頓下來,觀察我緊張的神情。她的臉很漂亮,但為人太神經質,是個挺可怕的人。「得意囉!」哄堂大笑,除了我。
「真係認真。」眼見我即將發飆,莊鄒連忙收起笑容,作資料補充,堵住我口。
「世界無放棄過任何一個人,包括你同埋所有抱怨嘅人。只係處理方式因人而異。大部份人雖然成日嗌生嗌死,但心底裡都係唔想放棄。呢類人,只要俾少少暗示佢,等佢發現到希望種子,佢就自然識得捉住,然後施肥淋水。
至於最後結果係點,當中牽涉好多變數,連世界都唔會知道。
你就屬於少數『得意』嘅人,對種子視而不見。所以,世界唯有派我哋呢類道行比較高嘅人嚟幫你。起碼要令你識得點樣去發現種子。之後種唔種,或者種嘅方法,就睇你自己決定!」
「多唔多人發現咗種子之後…決定唔種?」我結巴起來,是因為心中已有一個答案雛型。
「越嚟越多。」莊鄒的答案,和我預計的差不多。沉重,但符合世情。
「點解明明見到希望種子,都會選擇放棄?」我不明所以。
「我都唔明,因為我未試過有呢種心態。不過我留意到,佢哋都有共通點…」莊鄒十分慨嘆:「習慣傾向『否定自己』。」
我呆了,猛然想起今午,莊鄒那氣喘得扭曲的面容。「所以食晏嗰時,你同我講…」
「係。你的確有『否定自己』嘅傾向。」莊鄒的微笑,現出罕有的暖意:「不過未至於無得救。」
我不明白。何解我會比其他人更否定自己?
「你今晚好好回憶下,自己係幾時開始有『否定自己』嘅習慣?有無咩原因?」麥澤走過來,將修理好的電話交還給我。
「聽日,開始訓練。」寒菲剛好走出廚房,舒暢地伸一伸懶腰。
「加油呀!」萬珂以希冀的眼神為今晚的課題作結。
如喜歡本作,煩請大家訂閱和分享!
亦請到FB專頁讚好及追蹤!謝謝!
留言
發佈留言