《種子》（13）
「肥佬遵守諾言，放咗我哋，但係傻波變咗植物人，我同細威俾警察查咗好耐…雖然細威不停將責任推落我度，但係口供有太多破綻，所以變相對我有利。最後，我無罪釋放，喺法律上乜事都無。
但係學校仍然堅持將我革走，話咩『空穴來風』…好彩呢件事上咗新聞，幫我嘅社工識得利用輿論壓力，再加一句『有教無類』，逼學校收返我。
最慘係，當時老豆老母聽得太多閒言閒語，受咗好多壓力，無意間對我嚴咗好多。小小嘢都挑起佢哋神經，打到我飛起。我又唔敢還手，驚打傷佢哋…
不過，呢兩年無乜人講起件事，老豆老母都對我溫和咗，頂多用粗口鬧兩句，同埋限住每晚九點前返到屋企。不過就…以後唔准打交、打拳、參加比賽…」大輝嘗試用笑容去掩飾真實感覺，卻顯得苦上加苦。
「所以，你頭先俾人打到咁都唔還手…」麥澤恍然大悟。
「不過，陳諾登嘅體質捱唔到幾多拳，侷住我要出腳。」大輝別過臉，不讓我看到表情。
「放心！我一定會醫返好你。」昏倒的莊鄒突然彈起，嚇得我失聲大叫，不自覺摟著大輝。
「你唔係暈咗咩？」大輝問莊鄒，雙眼卻是瞪著我。
「我係淺睡，唔係暈咗…」莊鄒有點不好意思，勞煩了負傷的大家合力將她抱來抱去。
「傻嘅！無你，無黑蜂，我哋更加走唔出男廁。」麥澤安慰她。
「啲黑蜂係你叫過嚟？」我猛然憶起昨天茶廳門前那一幕蝶舞。果然不是偶然的奇事！
「唔係『叫過嚟』，係『做出嚟』。我喺淺睡狀態，可以無中生有。一瞓醒，嗰啲物件就會消失。」莊鄒笑道：「無論當時麥澤同寒菲噴啲乜嘢，我啲黑蜂都係會聽我指示，跟住佢哋五個。」
「平時…喺你身邊嘅蝴蝶…」大輝覺得莊鄒瘋狂，緊張得不自覺摟著我。
「嗰啲係本身存在，只係俾我氣場吸引過嚟，想同我傾下偈、一齊玩下。好多動物都好八卦，對人類好好奇。」莊鄒打趣講個冷笑話：「無聽過『莊周夢蝶』咩？其實『蝶』同『莊周』係好朋友。」
大輝無語。他需要多一點時間去搞清自己的思緒，去選擇「相信」或是「不相信」，就像昨天的我。今天的我，仍未能完全相信四姝的說話，但我想留在她們身邊，享受「同伴」的感覺。
「你哋係咪外星人？」我好奇「同伴」的背景。
莊鄒、麥澤和寒菲互相對望，嫣然一笑。
和其他「修行者」一樣，四人在過去多世中不斷修行，累積一定智慧和力量，可以在輪迴後慢慢重獲前生記憶和能力。所謂修行，就是在真理的道路上不斷提升自己、幫助他人。
世界會盡力用不同的方式解答所有人的題問，希望大家不要放棄。
奈何資質不高的人未必能輕易覺察答案。這時候，世界就會向修行者發出信息，請他們幫幫忙，以生命影響生命，讓大家有前行的目標和能力。
當然，不是每次都會成功。即使願意伸出援手，也需要對方願意被幫助。尤其是劣根性根深蒂固的人，要他們改變，簡直是要了他們的命！有時候，他們寧願放棄、寧願死，都不要改變。
不是說他們錯，只是替他們可惜。明明有能力比其他人活得更好，卻過不了心理關口…
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言