《種子》長篇小說（28）

《種子》（28）

「哇！」寒菲驚嘆，單手托腮的樣子很可愛：「好浪漫！」

「我一啲都感受唔到有咩咁浪漫！」我裝出不滿神情。

「你就係因為呢件事而收埋自己？」萬珂的惻隱之心永遠氾濫，輕易兩眼水汪汪。

「唔太肯定…因為唔覺得兩件事有咩直接關係，但又真係嗰件事之後開始有轉變。」為保資料準確，我再次在回憶中確認時間綫。

「睇嚟你嘅童年心理陰影面積都幾大…」大輝開玩笑。

「呢個機會都好大。」外賣哥認真思索著。

「我認同。但係連佢本人都察覺唔到當中關係，會比較棘手。」麥澤的經驗之談。

「只要佢自己唔放棄，就有解決嘅機會。」龍知梓學習速度奇快，短時間內已概略捕捉到莊鄒的思考模式，可惜欠缺經驗和智慧，未能提出可行方案。

「講得啱！」莊鄒呷了一口綠茶，幽幽微笑。「外賣哥有無事情需要補充？」

「無…無。」外賣哥沒料到莊鄒有此一問，略帶愕然。

龍知梓的書房，成為我們八人的基地。在座四位男生，只剩下外賣哥沒有「求助」。但任誰都看得出，他是羞於啟齒。

按照四姝的理論，這是「否定自己」的行為：不承認自己的問題，也就是「不敢正視自己」的表現。

「不如休息下！」大輝伸懶腰、打呵欠。

見他表現良好，大輝的父母一星期前撤去「宵禁令」；只要大輝適時致電報告行蹤，就可以了。大輝欣喜若狂，經常藉口到我家做功課，實則打機打到天昏地暗。虛耗過度，黑眼圈油然而生。

「桑拿？」龍知梓和大輝互換一個眼神，齊齊邪笑起來。

看見二人的趣怪表情，四姝哭笑不得，放行。我和外賣哥對此興趣不大，但也跟著兩隻識途老馬去見識見識。

擴建浴室和新設桑拿房，就是龍老先生接回龍知梓後，首份送他的大禮。

「爽！你爺爺真係識揀禮物！」大輝羨慕極了。

「每逢長假期，我都會去拜會出名嘅老師父，跟佢哋學太極同詠春。為興趣，為健康，為修心。爺爺知道咗，就搵人嚟整間桑拿房畀我。我都估唔到爺爺會咁誇張！」龍知梓的甜蜜笑容帶點唏噓：「可能係出於心理補償…」

「點都好啦！有得嘆就係好！」怕龍知梓會入情緒深谷，外賣哥連忙說好話，將他拉回天堂。

我們敞開心扉，談天說地，話題甚廣。不知是誰先提起，話題的焦點最後落在外賣哥身上，氣氛熱度急降。「你係咪唔想同佢哋四個溝通太深入？」

「係。」外賣哥嘆一口氣，直認不諱。「我嘅問題，唔想佢哋知道。好尷尬！」

*****（待續）

如喜歡本作，煩請大家訂閱和分享！
亦請到FB專頁讚好及追蹤！謝謝！