《種子》（5）
放學，我趁萬珂和莊鄒上廁所時，偷偷溜走。回到家中，當然立即登入討論區，查看究竟。
她們一直都稱呼我為「吾係西西弗斯」，從未叫過我真名。似乎她們在入學前已經知道我的網名。習慣了，未及改口。還有昨晚那條奇怪的私人訊息，說甚麼「我派了四個人幫你推石。明天會到達，請留意。」。好明顯，是講那四位大小姐…
消失了！不單是那條訊息，甚至是那位「被踐踏的山」亦人間蒸發似的，沒有任何可以被追查的紀錄或資料。應該是個很厲害的電腦高手吧…
一頭霧水之際，門鈴響起。瞥了瞥防盜眼，是外賣哥！「乜咁快嘅！唔使找！」我掏出四十大元。
「諾登哥喎！我點敢慢呀！」外賣哥是商科六班的高材生，家中頗為富裕。但為了培養正確的價值觀和處世態度，他選擇課餘時四處兼職打工，過上貼近現實的生活。上進之心，成為校內佳話，獲賜雅號「外賣哥」。不過，他和我不相識，不可能記得我的名字…
「你就好啦！豔福無邊！」話中帶酸。接過紙幣，他轉身溜去後樓梯，不需三秒。
我滿腔疑惑，一手捧著飯盒，一手拉閘。冷不防，一隻手從門側後伸出，攔下鐵閘，嚇得我連退幾步。「嚇親你…」寒菲狡滑地邪笑，一步擋在我面前：「對唔住！」
「打搞晒！」其餘三姝亦尾隨入屋，關閘關門，個個笑意盈盈。
「信唔信我報警拉你哋！？」我被惹怒了，亮出電話，作最後通牒。
「唔信。」麥澤斷言：「因為你想我哋喺你身邊。」
「癡線！」我立即連按9字鍵兩次，卻久久下不了手按第三次。的確，被她說中了…我氣得將電話重擲在地，任由它破裂散落。
「係咪癡線㗎！？」我痛罵自己：「係咪悶到癲咗？唔捨得四個傻婆…」激動得流淚，在廳中叉腰來回踱步，懶理四人異樣目光。
一直行、一直行，直至累極餓極，才願意坐下吃飯盒。滿口冷飯，再次刺激我的淚腺：「點解要咁對我？」掩面痛哭。
「唔好喊啦…」萬珂是最心軟的一個，率先上前坐到我身邊，為我拭淚。
「飯係你叫，又係你親自放入口。問點解？我真係答你唔到。」麥澤坐到萬珂對面，同時為我的紊亂邏輯深深嘆息。
「你嘅問題，只有你自己答到。」莊鄒緩緩坐在我對面，以清澈眼神直視我。
「我煮。」寒菲沒多話，直接拿走飯盒，走入廚房。
雪櫃門開合聲，水聲，刀砧碰擊聲，油濺聲，陣陣餸香飄出。寒菲端來五飯一餸。「大家食飯！」
蒜香豬扒（原是飯盒的餸）和雪櫃內的剩餘物資，經過巧手加工，變成菜遠蒜香茄子豬肉丁。本來屬於豬扒的過鹹調味料，被稀芡沖淡，均勻沾到後加的茄子和菜遠上，令整道菜式的色香味更勝從前。
「好好味…真係好好味…」我邊吃邊哭，但心情已是大大不同。「好有屋企感覺！」
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言