《種子》（15）
大輝的電話突然響起。他示意我從他的褲袋拿出電話，一望，是校務處！我們仨人不約而同愣了愣。「開speaker，一齊聽，但係你兩個唔好出聲。」大輝嘆氣，知道避無可避。
「請問係咪葉俊輝同學？我係Tepes College嘅書記…」電話另一頭，是一斯文有禮的男聲，鼻音極重。
「我係葉俊輝，不過你唔係書記喎！」大輝咬牙切齒：「龍知梓！」
龍知梓！？姓龍的？很可能是校董會的人！大輝認識他？但他的神情甚有火藥味…
「Good！記得我全名！」龍知梓的聲音聽來十分高興，卻帶有滿滿浮誇造作之嫌。「不枉我出盡全力，幫你哋冚咗廁所件事！」
「幫我哋？！明明係你帶頭搞事先！」大輝憤恨得幾近咆哮。這刻我才恍然大悟：龍知梓就是其中一個虐打我們的Die-hard
Evil！
「你無需要深究呢個問題。最緊要係搞掂咗件事，係咪？」口吻、語調、辭藻，龍知梓和「書生男」一模一樣。「有無諗過點樣報答我？」
「你有嘢就講、有屁就放！唔使咁多開場白。」大輝死充，完全忽視因著害怕而微顫的身體。
「聽日，你哋六個都要正常返學。」龍知梓狠擢大輝痛處：「返學喎！你唔珍惜，機會無咗就真係無㗎喇！」他到底在打甚麼鬼主意？
「你點先肯放過佢哋五個？」大輝已被無力感所擊潰，帶淚苦笑：「如果你肯放過佢哋，我可以退學。」
「聽日見！晚安！」龍知梓沒有正面回答大輝，自顧自掛線。
我們仨人呆了，一片死寂。
說真的，我不怕龍知梓，大不了就是轉校！大輝的處境和問題，我明白。反而，我最擔心的是莊爸，我實在看不透他在想甚麼。他的眼神很複雜，但反應很簡單：木無表情，不發一言，默默地替大輝繼續敷藥。
不一會，莊鄒、麥澤和寒菲都到來看看大輝的狀況，順道來交代萬珂的情況。
針灸後，萬珂已醒過來，但尚未完全回復，有點兒神智不清和偏頭痛，要留在這裡一晚，作更深入療和詳細觀察。若果情況許可，她明天就可以正常上課。
「請假休息下會好啲。」我建議。身體健康才是最重要。
「對於學習，佢不嬲都好固執。過咗二千幾年都仲係咁…」麥澤嘰咕喃喃。她是四人之中最實際的一個，難以理解沒有實質作用的固執行為。
「二千幾年？」大輝找到重點。
「有無聽過儒家嘅孟子？『孟母三遷』、『孟母斷機』個孟母，就係孟子嘅媽咪。孟子當年死咗之後，輪迴咗好多次。最近一次，就係我哋認識嘅萬珂。」莊鄒說得直白，但我和大輝的腦袋，還是未能跟得上步伐。
莊鄒沒有放過我們，繼續來一些爆炸性資訊：「我曾經係道家嘅莊子。」
「墨家嘅墨子。」麥澤接著說，不覺得是甚麼一回事。
「法家，韓非。」寒菲望著我和大輝的驚訝表情，佻皮地指著梳化上的功課簿，笑說：「萬珂最愛，勤力讀書。」
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言