《種子》（31）
「哇！」我、大輝和龍知梓，齊齊驚呼出來。
想不到自我保護意識甚強的外賣哥，可如此坦然講出自身問題，更想不到他有興趣的對象是麥澤，一個如此強勢的女生。
「你諗住下一步點做？」龍知梓好奇。
「我而家每半個月見醫生一次，不過成效唔大。所以之後會慢慢疏遠佢哋四個…雖然無對麥澤做成任何實質影響，但係咁樣對一個好女仔，始終唔係好事。」外賣哥的坦白，就是為了說明日後疏遠我們的原因：「我完全過唔到自己嗰關。」
「或者你換個角度諗。男人對女人有幻想好正常，只要唔好喺任何層面傷害到對方就得。即係你唔搞佢、唔俾佢知，就完全唔會傷害到佢。你唔講，連我哋三個猛男都睇唔出，何況佢哋四個！」大輝少有如此認真：「雖然我咁講係好賤格，但係你強行壓抑自己，遲早都會出事。倒不如，私下解決了事。」
「你對佢哋…」我不肯定自己是否想歪了：「私下做咗啲…咩事？」
「唔使驚喎！我對萬珂無興趣！」大輝邪笑著，反將我一軍。
「使唔使我幫你手，私下解決？」他一個快步竄到我身後，從後一臂熊抱我。他開玩笑的力度，完勝我之前和英叔打架時、垂死掙扎的力度。
「放開我啦！我唔搞gay㗎！」我嚇得雙手在空中亂舞。明知大輝純粹開玩笑，但猜想到他的目標是扯走圍著我下身的大毛巾，我當然極力掙扎！
可恨強弱懸殊，這貪玩成性的傢伙輕易一手扯掉大毛巾。豈料，龍知梓趁機扯走大輝的大毛巾，還一臉囂張：「好耐無同大家切磋武藝喇！」
大輝玩得興起，馬上接受挑戰，衝向龍知梓。我沒多想，跟著他跑，想要搶回我的大毛巾…
看著一絲不掛的三個大小孩做出反智行為，外賣哥先是愣了愣，然後提醒我仨要小心地滑，再來就是加入戰圈，亂搶一通…
第一次見到外賣哥笑得如此開懷！
外賣哥來自單親家庭，父親是頗為偏執的人，硬生生把自己的人生經驗和價值觀，照辦煮碗套在外賣哥和外賣妹（外賣哥的妹妹，不同校的）身上。
他的話，有其道理，但那只是適用於他一人的道理。若要硬套在他人身上，可以，但不會功效顯著。畢竟，每個人的處境和特質都不會一模一樣。
偏偏父親就是不明白，認定兄妹二人就是不夠努力，所以沒法取得優異成績。
兄妹倆天生都不是讀書的材料：外賣哥的長處在於攝影，外賣妹擅於唱歌。奈何，兩樣技能都不足以在這城巿謀生。
「我哋又唔係諗住全職喺呢方面發展，純粹當興趣。」外賣哥越講越氣餒：「但係阿爸認為唔好浪費一分一秒，全部時間都應該投放喺學業。話學業成績係會影響一世！」
外賣妹是個勇敢、主動的女生，屢次嘗試向父親表達意見，希望能夠透過最平和的方式解決兩者之間的分歧。結果，當然是屢試屢敗。
「我無細妹咁堅持，一早放棄咗，直接接受現實。」外賣哥再次露出平日的淡淡哀愁眼神。
男生們一直覺得外賣哥欠缺男子氣慨，奈何現在的女生們受韓風影響，就是喜歡比女人更像女人的男人。女同學們就是被他這種憂鬱氣質吸引。「可能，我無自己想像中咁鍾意攝影…」
我突然明白，四姝為何不厭其煩、一再強調「否定自己」的破壞性。
外賣哥就是一個活生生的例子。
*****（待續）
如喜歡本作，煩請大家訂閱和分享！
亦請到FB專頁讚好及追蹤！謝謝！
如喜歡本作，煩請大家訂閱和分享！
亦請到FB專頁讚好及追蹤！謝謝！
留言
發佈留言